വടക്കാഞ്ചേരി: ജില്ലാആശുപത്രിയില്‍ ആവശ്യത്തിനു ഡോക്ടർമാർ ഇല്ലാത്തതിനെ തുടർന്ന് രോഗികള്‍ വലയുന്നു. കാലവർഷം ശക്തിപ്രാപിച്ചതോടെ ദിനംപ്രതി നൂറുകണക്കിനു രോഗികളാണ് ആശുപത്രിയിലെത്തുന്നത്. ഉച്ചയ്ക്ക് ഒരുമണികഴിഞ്ഞാല്‍ പിന്നെ ഒരു ഡോക്ടറുടെ സേവനം മാത്രമാണ് ഉണ്ടാകുക.
പനികള്‍ പടർന്നുപിടിക്കുന്നതുമൂലം ആശുപത്രിയില്‍ എല്ലാ ദിവസവും രോഗികളുടെ നീണ്ടനിരയാണു കാണപ്പെടുന്നത്. വൈകീട്ട് ആറുകഴിഞ്ഞാല്‍ പിന്നെ എക്സെറെ ഉള്‍പ്പടെയുള്ള സേവനങ്ങളും ലഭിക്കാറില്ല. ആശുപത്രിയുടെ വികസനംലക്ഷ്യമിട്ട് നിരവധി കെട്ടിടങ്ങളാണ് കോടികള്‍ മുടക്കി നിർമിക്കുന്നതെങ്കിലും ആവശ്യമായ ഡോക്ടർമാർ ഇല്ലാത്തതാണ് വടക്കാഞ്ചേരി ജില്ലാ ആശുപത്രിയുടെ ശാപം. അതുകൊണ്ടുതന്നെ ബന്ധപ്പെട്ട അധികൃതർ ഉടൻ ഇടപെടണമെന്നാണു നാട്ടുകാരുടെ ആവശ്യം.