തൃശൂർ: കഴിഞ്ഞ വർഷത്തിൽ അതിശക്തമായ മഴയിൽ പൊട്ടിയതിനെ തുടർന്ന് പുനർനിർമ്മിച്ച കാര്യാട്ടുകരയിലെ മാരാർ കോൾപടവിന്റെ ബണ്ട് ഇന്നലെ രാത്രിയിലെ മഴയിൽ വീണ്ടും പൊട്ടി. കെഎൽഡിസി 39 ലക്ഷം രൂപ ചെലവിട്ടായിരുന്നു തകർന്ന ബണ്ട് പുതുക്കി നിർമ്മിച്ചത്.

60 ഏക്കറോളം വരുന്ന കോൾപടവ് കൃഷിക്കായി തയ്യാറെടുക്കുമ്പോഴാണ് കർഷകരെ പ്രതിസന്ധിയിലാക്കി വീണ്ടും ബണ്ട് പൊട്ടിയതും രണ്ടാം വർഷവും കൃഷി മുടങ്ങുന്നതും. പൊട്ടിയ ബണ്ട് പുനർ നിർമ്മിച്ചപ്പോൾ പുതിയ മണ്ണിട്ട ഭാഗം കയർ ഭൂവസ്ത്രമോ, ഓല, മുള എന്നിവ ഉപയോഗിച്ചോ ബലപ്പെടുത്തിയില്ലായിരുന്നു. ശക്തമായ മഴയിൽ പുതുമണ്ണ് താഴ്ന്ന് മണ്ണിടിഞ്ഞാണ് മടവീണത്.

പൊട്ടിയ ബണ്ട് അടിയന്തിരമായി ശാസ്ത്രീയമായി പുനർ നിമ്മിക്കണമെന്നും, കഴിഞ്ഞവർഷം ബണ്ടു പൊട്ടി കൃഷി പൂർണ്ണമായും നഷ്ടപ്പെട്ട കർഷകർക്ക് സഹായം നൽകണമെന്നും അഖിലേന്ത്യ കിസാൻ സഭ തൃശൂർ മണ്ഡലം കമ്മിറ്റി ആവശ്യപ്പെട്ടു. സെക്രട്ടറി കെ. അരവിന്ദാക്ഷമേനോൻ, ജില്ലാ വൈസ് പ്രസിഡണ്ട് ഷാജു കുണ്ടോളി എന്നിവർ പാടശേഖരം ഭാരവാഹികളുമായി വിഷയങ്ങൾ ചർച്ച ചെയ്തു.